لنقول للامريكان لا تبنو بار بشكل الكعبة المشرفة”
تدخل الجروب تلاقي حاجة غريبة .. صورة لمبنى اسود يشبه الكعبة موجود في مكان ما في الغرب . طبعا لو انت مش عارف ايه المبنى ده ..الدم هايفور في دماغك و هاتبدأ تسب و تلعن أمريكا و الأمريكان.. ببساطة لأن شركة آبل بتستهبل و عاملة بار و مسخرة على شكل الكعبة
المبنى حسب الجروب هو عبارة عن بار تملكه شركة آبل .. محدش سأل هي آبل تمتلك بار ليه؟ يعني تروح تشتري آي-بود و بالمرة تاخد كام كاس؟
طيب هو المبنى ده جديد؟ لأ مش جديد .. بس الجروب شكله جديد ..؟
الصورة اللي في الجروب حقيقية؟ لأ .. هو المبنى موجود أصلا؟ أيوه
طيب ازاي؟
اولا هذا المبنى هو محل تملكه شركة آبل و هو ليس بار .. هو منفذ بيع في مدينة نيويورك تحديدا.. ثانيا كل الصور الموجودة لهذا المبنى تظهره شفافا و ليس أسود اللون .. كل الصور التي يظهر فيها المبنى اسود اللون ما هي الا صور قديمة جدا عندما كان المبنى تحت الانشاء لكن المبنى أصلا زجاجي .. و بعدين المبنى مجرد مدخل ليس أكثر لأن المحل موجود تحت الأرض و تنزل له بسلالم
و بعدين المبنى بقاله زمن .. الجروب بقى بيطالب الأمريكان بايقاف بناء بار على شكل كعبة .. انتوا فين و الناس بقت فين
و بعدين .. شركة زي آبل تعمل حاجة مهينة للمسلمين ليه؟
و هو احنا ليه معتقدين ان الناس دي عندها استعداد تخسر دولار واحد علشان يهينوا المسلمين؟
ثم لماذا نعتقد أن شركة آبل أو مالكيها يعادون المسلمين أصلا؟
عدد أعضاء الجروب كام شخص بقى .. 223525 شخص
ربع مليون شخص عايشين في الوهم .. ربع مليون شخص لم يكلف اي واحد منهم نفسه بأن يبحث في صحة ما يقرأ .. ربع مليون شخص على أتم استعداد ان يعادوا أي حد في العالم لمجرد شبهة .. ربع مليون شخص ممكن يروحوا يحاربوا لمجرد شبهة ..امال فين ” لو جاءكم فاسق بنبأ” و لا ايه بالضبط؟
نظرية المؤامرة خلاص ,, أصبحت النظرية الوحيدة لتفسير كل ما حولنا في هذا العالم
يا خسارة .. و الله العظيم يا خسارة
From Apple website: http://www.apple.com/retail/fifthavenue/gallery/
The group: http://www.facebook.com/group.php?gid=18271553876
Filed under: 1
